Notkun áfengis veldur bæði andlegum og líkamlegum breytingum hjá þeim sem þess neyta. Hversu mikil sem áhrifin eru fer eftir ýmsum þáttum s.s. stærð, þyngd og kyni einstaklingsins, magni áfengis sem er neytt, hversu vanur einstaklingurinn er áfengisneyslu, hvort drukkið er á fastandi maga o.s.frv.

Áhrifin lýsa sér fyrst í örvuðu ástandi s.s. málgleði og auðveldari félagslegum samskiptum, einnig losnar um hömlur, dómgreind fer minnkandi, þvagmyndun eykst og minnið skerðist. Eftir því sem að meira er drukkið koma róandi áhrifin betur í ljós í t.d. þvoglumælgi, ósamhæfðum vöðvahreyfingum og augnriða, verulegri skerðingu á líkamlegri og andlegri getu og á endanum meðvitundarleysi. Eftir neyslu mjög stóra skammta verður öndunarstöðin fyrir áhrifum og hætta er á öndunarstöðvun og þar með dauða.

Áfengisneysla getur haft mikin skaða í för með sér á mörg líffæri líkamans. Hér að neðan er drepið á því helsta en sá listi er engan veginn tæmandi:

• Heilaskemmdir: Stöðug ofdrykkja getur valdið verulegum skemmdum á taugakerfinu og þá einkum í heilanum. Þessi áhrif geta komið fram sem breytingar á tilfinningaviðbrögðum einstaklingsins, persónuleika hans og viðhorfum. Einnig getur hæfileikinn til þess að læra nýja hluti minnkað og minni hrakað.
• Hjarta og blóðrás: Mikil áfengisdrykkja getur leitt til hækkunar blóðþrýstings og aukið hættu á heilablóðföllum. Hjartavöðvinn getur skemmst og við það dregur úr dælustarfsemi hjartans, auk þess sem það stækkar. Mæði kemur fram við litla áreynslu og óreglulegur hjartsláttur er algengur meðal drykkjusjúklinga. Alkóhól veldur því að æðar við yfirborð líkamans víkka út og við það eykst blóðflæði til húðar og veldur hitatilfinningu í fyrstu. En við það að blóð streymi í húðina lækkar líkamshiti og hætta á ofkælingu eykst.
• Lifrin: Lifrin er helsta efnavinnslustöð líkamans. Það ætti því ekki að koma á óvart að hún er það líffæri sem oftast verður hvað verst úti af völdum ofdrykkju. Hún sér um að vinna úr allt að 95% af öllu því alkóhóli sem berst út í blóðið og við niðurbrot áfengis myndast mörg efni sem geta ert og skemmt lifrarvefinn. Við drykkju fer lifrin að nýta alkóhól sem orkuefni í stað fitu sem safnast þá upp í lifrarvefnum og leiðir til svokallaðrar fitulifrar. Fitulifur er sjúklegt ástand sem þó gengur til baka ef hætt er að drekka. Ef drykkju er aftur á móti haldið áfram getur fitulifur þróast í alkóhóltengda lifrarbólgu og síðan skorpulifur. Skert lifrarstarfsemi sem fylgir skorpulifur getur leitt til dauða.
• Meltingarkerfi: Áhrif áfengis á líffæri meltingarkerfisins eru meðal annars að það ertir slímhimnur sem getur leitt til magasára, oft blæðandi. Áfengisdrykkja slakar á vöðvum við efra magaop og getur langvarandi drykkja valdið vélindabakflæði sem leiðir af sér þrálátar bólgur og aukna hættu á krabbameini.
• Briskirtill: Langvarandi neysla getur valdið drepi í frumum sem leiðir til brisbólgu, oft samfara þrálátum sársauka. Brisbólga af völdum áfengisneyslu virðist stuðla að krabbameinsmyndun í kirtlinum.
• Kynkerfi: Kynkerfi beggja kynja verður fyrir áhrifum af langvarandi áfengisneyslu. Hjá körlum rýrna eistun og framleiða minna af testósteróni. Á sama tíma minnkar geta lifrar til að brjóta niður kvenhormón sem er myndað í svolitlu magni í nýrnahettum karla. Afleiðingarnar geta verið stækkuð brjóst, líkamshár minnka eða hverfa og kynhvöt og reisnargeta dvína. Hjá konum getur truflun á tíðahring verið algeng. Hjá báðum kynjum dregur áfengisneysla úr frjósemi.
• Úttaugakerfi: Úttaugakerfið, það er taugarnar sem liggja til og frá heila og mænu, getur orðið fyrir varanlegum skaða af mikilli neyslu áfengis. Afleiðingin er fjöltaugabólga með minna afli og tilfinningu í útlimum, aðallega í fótleggjum. Á vægara stigi eru dofi, stingir og afbrigðileg tilfinning áberandi
• Útlimavöðvar: Vitað er að alkóhólistar eiga á hættu að fá vöðvarýrnun sem bundin er við vöðva í útlimum, sérstaklega fótleggjum. Sterkar líkur er á því að etanól kunni að skaða frumur í öllum beinagrindarvöðvum þannig að enzým og önnur efni í frymi leki út. Þessu fylgir sársauki eða eymsli í vöðvum. Þetta getur sennilega einnig gerst í vægu formi við félagslega notkun áfengis.
• Næringarskortur: Áfengi er hitaeiningaríkt orkuefni en í því er lítið af næringarefnum eins og eggjahvítuefni, fitu, steinefnum og vítamínum. Óhófleg áfengisneysla dregur oft úr löngun í mat sem leiðir til næringarskorts. Þvagræsandi áhrif alkóhóls eru vel þekkt en með þvaginu tapast gjarnan mikilvæg steinefni.
• Fóstur: Áfengisdrykkja á meðgöngu getur valdið fósturskaða og haft áhrif á þroska hins ófædda barns síðar meir. Alvarlegustu skemmdir sem áfengisneysla á meðgöngu getur haft er svokallað áfengisheilkenni (Fetal Alcohol Syndrome) en þar fer saman minnkaður vöxtur, lítill heili, gat milli gátta hjartans, stutt augnrifa og vanþróaðir kjálkar. Lítill heili þessara barna merkir oftast minni vitsmuni en eðlilegt er og þar af leiðandi minni eða seinni þroska. Áfengisneysla á meðgöngu getur einnig leitt til fósturláts, stuðlað að fæðingu fyrir tímann og dauða á nýburaskeiði.